Lis fontanis

Ogni borc al à tal mieç une fontane fate dal inzegnîr Valentino Marioni tai agns 1830-1840: a son vascjis otagonâls di piere calcarie di For Disot.

La vascje principâl e je fate di lastris verticâls tacadis dongje une cun chê altre: tai borcs di Vîc e Tredul e je poiade parsore di un scjalin otagonâl, invezit a Baselie, suntune scjalinade circolâr salisade.

Tal mieç des fontanis, une colone e ten sù une o dôs vascjutis, o un vâs di finiment parsore dal bacin plui grant, che a fasin un zûc di aghe prime che e coli jù te vascje principâl: di culì, la aghe in plui e cor vie pai tubui che di sot tiere a rivin te roie plui dongje.

La roe di Tredol

Te ete medievâl, dal Riul dai Mulins (Riù dai Mulins) si è derivade une roie che e puartave la aghe tal borc di Tredul corint scuvierte framieç des cjasis, compagnade dilunc vie di cordonadis di piere.

Ilustrazion: cjaldîr di ram cun decorazions di elements vegjetâi a sbalç par aurî la aghe tes fontanis publichis. Il mani, fat cuntun tondin di fier, al jentre des dôs busutis che a son in corispondence des orelis dal recipient.

No si sa ben cuant che al è stât fat l’acuedot comunâl, ma za tal 1839 si fevelave de necessitât di comedâlu. I condots che a puartavin aghe aes trê borgadis di For Disot a jerin fatis sigûr di len di pin, costruidis sbusant i troncs cun trivelis une vore lungjis e tacâts tra di lôr a mo di plere.

Il prin acuedot al coreve sot tiere a une profonditât di 80 centimetris traviersant cjamps e terens privâts. Intun secont moment al è stât rinfuarcît cun tubui di ghise tacâts tra di lôr cun plomp e cuardis di barcje.

A metât dal Votcent l’acuedot al jere lunc doi chilometris.