Lis Stradis des Aghis
Il Mulin di Lalo Carote
Canâl di len e ruede a cassets – 1929
Fotografie fate in ocasion de Ricognizion pe compilazion dal “Atlante Linguistico Italiano”
Foto © Archivio fotografico Società Filologica Friulana – Fondo Ugo Pellis
Il mulin
Il mulin al è un edifici logât simpri dongje di un cors di aghe: cheste, derivade di un cors principâl, e môf une ruede a palis. Par tacâ a lavorâ si vierç la scluse di mût che il flus di aghe al bati su la ruede che e tache a zirâ. La scluse e covente ancje par ralentâ il lavôr o pûr par fermâlu.
A son dôs tipologjiis di mulins a aghe: un cu la ruede orizontâl, chel altri, verticâl.
Tal prin câs, la aghe e bat la ruede disponude in maniere orizontâl che e met in moviment la muele. Duncje, a ogni zîr di ruede al corispuint un zîr di muele.
Tal secont câs, la ruede verticâl e à di vê un argagn che al trasferissi il so moviment di un arbul di distribuzion orizontâl a un verticâl. Ancje se cheste costruzion e je plui complesse, chest sisteme al à il vantaç di fâi fâ ae muele plui zîrs e duncje al alce la produtivitât.
Ruota vecchio mulino – 1931
Foto © Paul Scheurmeier – Archivio AIS foto n° 2896 – Istituto di Lingue e Letterature Romanze e Biblioteca Karl Jaberg, Università di Berna.
Il Mulin di Lalo Carote
No si sa cuant che al è stât fat sù il Mulin di Lalo Carote (par tradizion, il mulin al cjape il non dal so proprietari); dai documents si sa che al è stât atîf fin tal 1930.
Tipologjiis di ruedis
Ruede idrauliche par parsore a cassets
Si imbrene la aghe cun canaletis di len stretis e si le fâs rivâ insom de ruede. Colant jù, la aghe e jemple i cassets che, smontant cul lôr pês, a fasin zirâ la ruede. Al è un motôr une vore eficient.
Ruede idrauliche par sot a paletis
La aghe e môf lis palis sburtantlis dal bas. Par otignî plui risultâts cun cheste tecniche si à di valutâ ben trope part di ruede che e à di stâ dentri de aghe. Al è un motôr pôc eficient.
Ruede idrauliche par in bande
E funzione midiant di dôs fuarcis: la energjie cinetiche e il pês de aghe. E je mancul eficiente de tecnologjie cu la ruede a cassets.
For Disot e lis sôs fabrichis idraulichis
Tai agns 1798-1948, dilunc de Roie dai Mulins a funzionavin cuindis fabrichis idraulichis.
La difusion de energjie eletriche, i mudaments socioeconomics e soredut l’incendi dai nazifassiscj che al à devastât il paîs tal 1944, a àn fat discomparî la plui part di chestis struturis.
MULIN PAR BLAVIS
Il mulin a muelis al jere un argagn agricul che al permeteve di masanâ blavis.
Al veve dôs ruedis di piere une vore dure: une fisse, e une che e zirave.
La blave, cjariade te tramuele, e colave framieç des muelis: passant pal spazi tra lis dôs ruedis, si masanave deventant farine. Po dopo, si tamesave a man il masanât.
MULIN A PESTEI
Il mulin a pestei al coventave soredut par gjavâ vie la glume dal vuardi,
un gran une vore comun te zone alpine prime che si slargjàs la coltivazion dal sorc.
Par solit, cheste tipologjie di mulin e veve un recipient di piere dulà che si metevin i grans e un pestel di len cu la ponte di fier che si moveve in direzion verticâl. Cul moviment e sfreolantsi, i grans si netavin vie dal tegument.
MAI
Il mai si lu doprave tes fariis, al jere come un martiel grues che al bateve sul incuin.
La ruede idrauliche verticâl e veve camis su la bree di len che a trasmetevin il moviment rotatori a une grande trâf di len che cussì e lave indenant e indaûr. Su la ponte de trâf al jere montât un martiel pesant. Il fier imbuît tra l‘incuin e il martiel si lu modelave fin ae forme che si voleve vê.
IL FOL
In gjenerâl, il fol al jere fat di une schirie di vascjis cun grancj martiei movûts de fuarce idrauliche.
A For Disot a ‘nd jerin doi:
– il “Fol di Sorzent”, che al veve ancje une grande cjalderie, al jere doprât des feminis par lavâ e inmorbidî la tele di cjanaipe e i linzûi.
– il “Fol di Paine” dulà che si netave e sgarzave la lane grese. Culì, in plui, si lavorave il corean par fâ ghetis e scarpis.
TURBINIS ELETRICHIS
Lis turbinis idraulichis a mudin la energjie cinetiche de aghe in energjie mecaniche. La alte pression de aghe e fâs zirâ lis palis de turbine che a sô volte e môf un gjeneradôr eletric, produsint energjie eletriche.
A For Disot, tal 1921, e jere state inmaneade la “Società per Azioni industriale – commerciale Fornese” par produsi energjie eletriche e lavorâ il len cun tecnologjiis mecanichis. La societât e furnive energjie a dut il paîs.
SEE AE VENEZIANE
Te see ae veneziane, la energjie idrauliche e moveve la see che e trasformave i troncs in breis.
Une see e jere za ative tal Sîscent, “la Siee”, logade dilunc dal Tiliment, che a lavorave par ducj.
A jere ative par cuatri mês ad an; si le afitave, e i condutôrs a lavin daûr di un regolament comunâl che ju obleave a proviodi ae manutenzion e a no lavorâ il len di sfrôs.
Bibliografia:
Polo E., Toponomastiche di For Disot. Comune di Forni di Sotto, 2003
Polo E., Forni di Sotto Lotte Fatiche Opere nel 1800. Editrice Aura e Centro Cultura, 1989
Polo E., Vocabolari Fornez -Talian, 2018
Scarin E., La casa rurale nel Friuli. C.N.R., 1943
Bertossi S., Vecchie case dei Forni Savorgnani. Azienda Autonoma di Soggiorno e Turismo di Forni di Sopra, 1973
La Carnia di Antonelli - Ideologia e Realtà. Centro Editoriale Friulano, 1980
Scheuermeier P., Il lavoro dei contadini. Cultura materiale e artigianato rurale in Italia e nella Svizzera italiana e retoromanza, Milano 1980, Edizioni Longanesi
Copyright © 2024 Comune di Forni di Sotto. All Rights Reserved
