Lis fontanis

Ogni borc al à tal mieç une fontane fate dal inzegnîr Valentino Marioni tai agns 1830-1840: a son vascjis otagonâls di piere calcarie di For Disot.

La vascje principâl e je fate di lastris verticâls tacadis dongje une cun chê altre: tai borcs di Vîc e Tredul e je poiade parsore di un scjalin otagonâl, invezit a Baselie, suntune scjalinade circolâr salisade.

Tal mieç des fontanis, une colone e ten sù une o dôs vascjutis, o un vâs di finiment parsore dal bacin plui grant, che a fasin un zûc di aghe prime che e coli jù te vascje principâl: di culì, la aghe in plui e cor vie pai tubui che di sot tiere a rivin te roie plui dongje.

Une volte le Fontane di Vîc a dave di bevi aes fameis e aes lôr bestiis. A jerin massime feminis e frutis che a lavin a aurîle, fermantsi par fevelâ e contâsi gnovis.

Il buinç e i cjaldîrs
Puartâ la aghe al jere un lavôr pesant che si faseve cul buinç (l’agâi), o sedi un arc di len puartât sù pes spalis cun lincins di fier tes pontis par picjâ i cjaldîrs, un par bande, par belançâ la cjame che e jere avonde pesante.

Dutis lis cjasis a vevin i seglots di ram (i cjaldêrs) picjâts parsore dal seglâr: a coventavin a puartâ a cjase la aghe auride des feminis te fontane.
Stant che a jerin di ram, un materiâl di alte cualitât, si ju tignive une vore di cont: si ju netave cun farine di sorc e asêt,

e ogni tant si ju justave par dentri cul stagn par che a tignissin ben la aghe e par che il ram nol les rusin.

Tal 1935 il guvier fassist al veve promovût la campagne “Oro alla Patria” domandant ae int di furnî materiâi preseâts par sostignî la vuere in Etiopie. Cussì i cjaldîrs di ram a son stâts sostituîts di seglots cence valôr. Ma cualchidun, par une fortunade prudence, a ‘nd à metûts cualchidun di bande, si che cumò ju podìn viodi esponûts in cualchi museu dal Friûl.